കടുത്തുരുത്തി: അകാലത്തിൽ വേർപിരിഞ്ഞ മകന്റെ ഓര്മയ്ക്കായി കടുത്തുരുത്തി മണ്ഡലത്തിലെ പാവപ്പെട്ടവർക്കായി രണ്ട് ചാരിറ്റി പ്രവര്ത്തനങ്ങള്ക്ക് തുടക്കം കുറിക്കുമെന്ന് മോന്സ് ജോസഫ് എംഎൽഎ. എമ്മാനുവേല് മെമ്മോറിയല് പാര്പ്പിട പദ്ധതിയും എമ്മാനുവേല് മെമ്മോറിയല് എഡ്യുക്കേഷന് പദ്ധതിയുമാണ് നടപ്പാക്കുന്നത്.
വീടില്ലാത്തവര്ക്കും ചോര്ന്നൊലിക്കുന്ന വീട്ടിൽ കഴിയുന്നവര്ക്കും സംരക്ഷണമൊരുക്കുന്നതാണ് ഒരു പദ്ധതി. സാമ്പത്തികമായി ബുദ്ധിമുട്ട് നേരിടുന്ന മിടുക്കരായ കുട്ടികള്ക്ക് നഴ്സിംഗ്, ഉപരിപഠനങ്ങള് എന്നിവയ്ക്ക് സഹായം നൽകുന്ന വിദ്യാഭ്യാസ പദ്ധതിയാണ് മറ്റൊന്ന്.
പ്രവാസി സുഹൃത്തുക്കളുടെ സഹായത്തോടെ 30 ലക്ഷം രൂപയുടെ സഹായം ഇതിനോടകം പലർക്കായി നല്കാന് കഴിഞ്ഞിട്ടുണ്ട്. സര്ക്കാര് സഹായമില്ലാതെയാണ് ഈ രണ്ട് പദ്ധതികളും നടപ്പാക്കുന്നതെന്നും അര്ഹതയുള്ളവര്ക്കെല്ലാം പദ്ധതിയിലൂടെ സഹായം ലഭ്യമാക്കുമെന്നും എംഎല്എ പറഞ്ഞു.
കടുത്തുരുത്തി മണ്ഡലത്തിലെ ജനങ്ങള് നല്കിയ സ്നേഹത്തിനും അംഗീകാരത്തിനും നന്ദി പറയാന് വാക്കുകളില്ലെന്നും കഴിഞ്ഞതവണ പ്രതികൂല സാഹചര്യങ്ങളില് കുറഞ്ഞ ഭൂരിപക്ഷത്തിന് വിജയിക്കാനായെങ്കില് ഇക്കുറി എതിരാളികളുടെ എല്ലാ നുണ പ്രചാരണങ്ങളെയും ആക്ഷേപങ്ങളെയും തട്ടിത്തെറിപ്പിച്ച് ജനങ്ങള് നല്കിയ വന്ഭൂരിപക്ഷത്തിന് എല്ലാവരോടും കടപ്പെട്ടിരിക്കുന്നതായും മോൻസ് കൂട്ടിച്ചേർത്തു.
