നിയമസഭാ തെരഞ്ഞെടുപ്പിന്റെ വോട്ടെടുപ്പ് നടക്കുന്നതിനാല് സംസ്ഥാനത്ത് രണ്ടുദിവസം ഡ്രൈ ഡേ. ഇന്ന് വൈകുന്നേരം ഏഴ് മണി മുതല് വോട്ടെടുപ്പ് അവസാനിക്കുന്ന വ്യാഴാഴ്ച വൈകുന്നേരം വരെ മദ്യ വില്പനയുണ്ടാകില്ല. മെയ് നാലിന് വോട്ടെണ്ണല് ദിനത്തിലും മദ്യ വില്പനയുണ്ടാകില്ല.
ഏപ്രില് ഒമ്പതിന് വോട്ടെടുപ്പ് സമയം അവസാനിക്കുന്നതിന് 48 മണിക്കൂര് മുന്പ് മുതല് ഡ്രൈ ഡേ ഉത്തരവ് നിലവില് വരും.
ഏതെങ്കിലും മണ്ഡലങ്ങളിലോ പോളിങ് ബൂത്തുകളിലോ റീപോളിങ് ആവശ്യമായാല് ആ ദിവസം ആ മേഖലകളിലും ഡ്രൈ ഡേയായിരിക്കും. വോട്ടെണ്ണല് ദിനമായ മെയ് നാലിനും കേരളത്തില് മദ്യശാലകള് പ്രവര്ത്തിക്കില്ല.
ഈ ദിവസങ്ങളില് പൊതുസ്ഥലങ്ങളിലേക്കോ ഭക്ഷണശാലകളിലോ ലഹരി വസ്തുക്കള് വാങ്ങുകയോ ശേഖരിക്കുമോ വിതരണം ചെയ്യുകയോ ഉപയോഗിക്കുകയോ ചെയ്യാന് പാടില്ല. മദ്യശാലകള് ഉള്പ്പെടെയുള്ള ക്ലബ്ബുകള്ക്കും ഹോട്ടലുകള്ക്കും നിരോധനം ബാധകമാണ്.
വ്യക്തികൾ മദ്യം സംഭരിച്ചുവെക്കുന്നത് കർശനമായി നിരോധിച്ചിട്ടുണ്ട്. അയൽ സംസ്ഥാനങ്ങളിൽ നിന്നുള്ള നിയമവിരുദ്ധമായ മദ്യക്കടത്ത് തടയാൻ അതിർത്തികളിൽ കർശന പരിശോധന നടത്തും. എക്സൈസ് നിയമങ്ങൾ ലംഘിക്കുന്നവർക്കെതിരെ കർശന നടപടി സ്വീകരിക്കാൻ എക്സൈസ് കമ്മീഷണർക്കും പൊലീസിനും നിർദ്ദേശം നൽകിയിട്ടുണ്ട്.
