പാതാമ്പുഴ: മഴയെ അവഗണിച്ച് പാതാമ്പുഴയിൽ നടന്ന ഓണാഘോഷത്തിന് ആദ്യദിനത്തിൽ ആവേശകരമായ തുടക്കം. ഡി.വൈ.എഫ്.ഐ പാതാമ്പുഴ, മുരിങ്ങപ്പുറം, മന്നം യൂണിറ്റുകളുടെ നേതൃത്വത്തിൽ എ.ഐ.ഡി.ഡബ്ല്യു.എ., ബാലസംഘം എന്നിവയുടെ സഹകരണത്തോടെ സംഘടിപ്പിക്കുന്ന ഓണാഘോഷത്തിന്റെ ആദ്യദിന പരിപാടികൾ രാത്രി വൈകിയും നീണ്ടു.
14 വയസ്സിൽ താഴെയുള്ള കുട്ടികൾക്കായി വിവിധ മത്സരങ്ങളാണ് ആദ്യദിനത്തിൽ നടന്നത്. മഴയിലും ആവേശം ചോരാതെ കുട്ടികൾ മത്സരങ്ങളിൽ പങ്കെടുത്തു. രാത്രി വൈകിയും നടന്ന കുട്ടികളുടെ വടംവലി മത്സരവും ശ്രദ്ധേയമായി. ആവേശകരമായ മത്സരത്തിനൊടുവിൽ കുട്ടികളുടെ വടംവലിയോടെയാണ് ആദ്യദിന പരിപാടികൾക്ക് സമാപനമായത്.
ആദ്യദിനത്തിലെ മത്സരങ്ങളിലെ വിജയികൾക്കുള്ള സമ്മാനങ്ങൾ ഈരാറ്റുപേട്ട ബ്ലോക്ക് പഞ്ചായത്ത് അംഗം ബീന മധുമോൻ, പൂഞ്ഞാർ തെക്കേക്കര ഗ്രാമപഞ്ചായത്ത് അംഗങ്ങളായ മിനിമോൾ ബിജു, നിഷ സാനു, എം.പി. പ്രമോദ് എന്നിവർ വിതരണം ചെയ്തു.
രണ്ട് ദിവസങ്ങളിലായി 35ഓളം മത്സരങ്ങളാണ് പാതാമ്പുഴയിൽ നടക്കുന്നത്. വിവിധ പ്രായവിഭാഗങ്ങളിലായി സംഘടിപ്പിക്കുന്ന കായിക-കലാ മത്സരങ്ങൾ നാടിന്റെ കൂട്ടായ്മയുടെയും സൗഹൃദത്തിന്റെയും വേദിയായി മാറുകയാണ്.
രണ്ടാംദിന പരിപാടികൾ ഇന്ന് രാവിലെ തുടരും. വിവിധ വിഭാഗങ്ങളിലായി കൂടുതൽ മത്സരങ്ങളും കലാപരിപാടികളും ഇന്ന് നടക്കും. ജാതിമത ഭേദമന്യേ നാട്ടുകാരുടെ പങ്കാളിത്തത്തോടെയാണ് ഓണാഘോഷം സംഘടിപ്പിക്കുന്നത്.
