പാലാ: രൂപത കോർപ്പറേറ്റ് എഡ്യൂക്കേഷണൽ ഏജൻസിയും പാലാ സെന്റ് തോമസ് കോളേജും സംയുക്തമായി സംഘടിപ്പിക്കുന്ന സീപ് ഫുട്ബോൾ സൂപ്പർ ലീഗിൽ ആവേശകരമായ പോരാട്ടങ്ങൾ തുടരുന്നു.
ഇന്ന് നടന്ന മത്സരങ്ങളിൽ കടനാട് സെന്റ് സെബാസ്റ്റ്യൻസ് ഹൈസ്കൂൾ തകർപ്പൻ വിജയം നേടിയപ്പോൾ, ഇലഞ്ഞിയിൽ നടന്ന മത്സരം സമനിലയിൽ കലാശിച്ചു. കടനാട് സെന്റ് സെബാസ്റ്റ്യൻസ് സ്കൂളും കൂട്ടിക്കൽ സെന്റ് ജോർജ്ജ് സ്കൂളും തമ്മിൽ നടന്ന മത്സരത്തിൽ ആതിഥേയരായ കടനാട് ഒന്നിനെതിരെ മൂന്ന് ഗോളുകൾക്ക് (3-1) കൂട്ടിക്കൽ സെന്റ് ജോർജ്ജ് ഹൈസ്കൂളിനെ പരാജയപ്പെടുത്തി. കടനാടിന് വേണ്ടി രണ്ട് ഗോളുകൾ നേടിയ അഭിഷേക് ആണ് മാൻ ഓഫ് ദി മാച്ചായി തിരഞ്ഞെടുക്കപ്പെട്ടത്.
ഇലഞ്ഞി സെന്റ് പീറ്റേഴ്സ് സ്കൂളും കാഞ്ഞിരത്താനം സെന്റ് ജോൺസ് സ്കൂളും തമ്മിൽ ഇലഞ്ഞി സ്കൂൾ ഗ്രൗണ്ടിൽ നടന്ന പോരാട്ടം ഗോൾരഹിത സമനിലയിൽ (0-0) പിരിഞ്ഞു. മികച്ച സേവുകളിലൂടെ കാഞ്ഞിരത്താനത്തിന്റെ ഗോൾവല കാത്ത ഗോൾകീപ്പർ ഫെൽബിൻ മത്സരത്തിലെ മാൻ ഓഫ് ദി മാച്ച് പുരസ്കാരം നേടി.
