പൂഞ്ഞാർ: ലോക പരിസ്ഥിതി ദിനത്തോടനുബന്ധിച്ച് കേരള ശാസ്ത്ര സാഹിത്യ പരിഷത്ത് പൂഞ്ഞാർ തെക്കേക്കര യൂണിറ്റിന്റെ നേതൃത്വത്തിൽ പൂഞ്ഞാർ കുടുംബാരോഗ്യ കേന്ദ്രത്തിൽ വൃക്ഷതൈ നട്ടും പരിസ്ഥിതി സംരക്ഷണ സന്ദേശം ഉയർത്തിയും പരിപാടി സംഘടിപ്പിച്ചു. “പ്രകൃതിക്കായി ഒരു കൈത്താങ്ങ് ആവാം” എന്ന സന്ദേശം മുൻനിർത്തിയാണ് പരിപാടി സംഘടിപ്പിച്ചത്.
പരിപാടിയുടെ ഉദ്ഘാടനം പൂഞ്ഞാർ കുടുംബാരോഗ്യ കേന്ദ്രം മെഡിക്കൽ ഓഫീസർ ഡോ. പ്രെറ്റി രാജ് നിർവഹിച്ചു. പരിസ്ഥിതി സംരക്ഷണം ഓരോ വ്യക്തിയുടെയും സാമൂഹിക ഉത്തരവാദിത്വമാണെന്നും പ്രകൃതിയെ സംരക്ഷിക്കുന്ന പ്രവർത്തനങ്ങളിൽ എല്ലാവരും പങ്കാളികളാകണമെന്നും അവർ പറഞ്ഞു.
കേരള ശാസ്ത്ര സാഹിത്യ പരിഷത്ത് പൂഞ്ഞാർ തെക്കേക്കര യൂണിറ്റ് പ്രസിഡന്റ് വി. ഹരിദാസ് അധ്യക്ഷത വഹിച്ച യോഗത്തിൽ യൂണിറ്റ് സെക്രട്ടറി അനീഷ് പി.സി സ്വാഗതം ആശംസിച്ചു. പരിസ്ഥിതി സംരക്ഷണത്തിനും ജൈവവൈവിധ്യ സംരക്ഷണത്തിനുമായി കൂട്ടായ ഇടപെടലുകൾ ശക്തമാക്കേണ്ടതിന്റെ ആവശ്യകത വിവിധ വക്താക്കൾ ചൂണ്ടിക്കാട്ടി.
മേഖല സെക്രട്ടറി പ്രസന്നകുമാർ, ഈരാറ്റുപേട്ട ബ്ലോക്ക് പഞ്ചായത്ത് അംഗം ബീന മധുമോൻ, പൂഞ്ഞാർ തെക്കേക്കര ഗ്രാമപഞ്ചായത്ത് അംഗങ്ങളായ സുജിത്ത് പി.സി, എം.പി. പ്രമോദ്, നിഷ സാനു, ശാസ്ത്ര സാഹിത്യ പരിഷത്ത് മേഖല പ്രതിനിധികളായ ഡി. രാജപ്പൻ, ഇ.എ. മോഹനൻ എന്നിവർ സംസാരിച്ചു.
പരിപാടിയുടെ ഭാഗമായി കുടുംബാരോഗ്യ കേന്ദ്രം പരിസരത്ത് വൃക്ഷതൈ നട്ടു. കൂടാതെ, ശുചിത്വ പ്രവർത്തനങ്ങൾക്ക് പിന്തുണയായി കേരള ശാസ്ത്ര സാഹിത്യ പരിഷത്ത് പൂഞ്ഞാർ തെക്കേക്കര യൂണിറ്റിന്റെ നേതൃത്വത്തിൽ കുടുംബാരോഗ്യ കേന്ദ്രത്തിന് വേസ്റ്റ് ബിൻ യൂണിറ്റ് പ്രസിഡന്റ് വി. ഹരിദാസ് മെഡിക്കൽ ഓഫീസർ ഡോ. പ്രെറ്റി രാജിന് കൈമാറി.
പരിസ്ഥിതി സംരക്ഷണവും ശുചിത്വ ബോധവത്കരണവും ഒരുപോലെ പ്രോത്സാഹിപ്പിക്കുന്ന പരിപാടി ജനപങ്കാളിത്തത്തോടെ നടന്നു. ഹരിത സന്ദേശം സമൂഹത്തിലേക്ക് കൂടുതൽ വ്യാപിപ്പിക്കണമെന്ന ആഹ്വാനത്തോടെയാണ് പരിപാടി സമാപിച്ചത്.
