പാലാ: സമസ്ത മേഖലകളിലും പരാജയമായ പാലാ നഗരസഭ ഭരണം കെടുകാര്യസ്ഥതയുടെ പര്യായമായി മാറിയെന്ന ആരോപണവുമായി പ്രതിപക്ഷം രംഗത്ത്. പാലാ പ്രസ് ക്ലബ്ബില്‍ വിളിച്ച് ചേര്‍ത്ത വാര്‍ത്താ സമ്മേളനത്തിലാണ് നഗരസഭാ പ്രതിപക്ഷ കൗണ്‍സിലര്‍മാര്‍ ഭരണ കക്ഷിക്കെതിരെ രംഗത്തെത്തിയത്.
നഗരസഭയില്‍ ഭരണസമിതിയുടെ കഴിവുകേടും കെടുകാര്യസ്ഥതയും മൂലം ഭരണ സ്തംഭനവും വികസനം മുരടിപ്പുമാണ് കഴിഞ്ഞ നാലുവര്‍ഷംകൊണ്ട് സംഭവിച്ചത്. അഞ്ചു വര്‍ഷത്തിനിടയില്‍ നാല് നഗരസഭാ ചെയര്‍മാന്‍മാരെ സൃഷ്ടിച്ചു എന്നല്ലാതെ യാതൊരുവിധ പ്രയോജനവും നഗര ഭരണം കൊണ്ട് നഗരവാസികള്‍ക്ക് ഉണ്ടായിട്ടില്ല.
സംസ്ഥാനഭരണവും മന്ത്രിയും കൈപ്പിടിയില്‍ ഉണ്ടായിട്ടും ചൂണ്ടിക്കാണിക്കാന്‍ പറ്റുന്ന അഭിമാനകരമായ ഒരു പദ്ധതി പോലും ഈ നാല് വര്‍ഷക്കാലയളവിനുള്ളില്‍ നഗരത്തില്‍ നടപ്പിലാക്കാന്‍ നഗര ഭരണാധികാരികള്‍ക്ക് സാധിച്ചിട്ടില്ല.
മാറിമാറി വന്ന നാലു ചെയര്‍മാന്‍മാര്‍ ഒരുപാട് പ്രഖ്യാപനങ്ങള്‍ നടത്തിയെങ്കിലും ഒന്നുപോലും പ്രാവര്‍ത്തികമാക്കാനും യാഥാര്‍ത്ഥ്യമാക്കുവാനും ഇവര്‍ക്ക് സാധിച്ചിട്ടില്ല. നഗരസഭയുടെ തനത് വരുമാനത്തില്‍ നാമമാത്രമായ വര്‍ദ്ധനവ് പോലും ഉണ്ടാക്കുവാന്‍ സാധിക്കാത്ത കഴിവുകെട്ട ഭരണസമിതിയാണ് പാലായിലുള്ളത് എന്ന് ഖേദത്തോടെ പറയേണ്ടിവരും.
പബ്ലിക് ടോയ്‌ലറ്റുകളുടെ ശോചനീയാവസ്ഥ:
നഗരസഭാ പരിധിയിലെ പബ്ലിക് ടോയ്‌ലറ്റുകളുടെ ശോചനീയാവസ്ഥ പാലായ്ക്ക് വലിയ അപമാനമാണ്. നഗരസഭാ ഓഫീസിന് നേരെ എതിര്‍വശം സ്ഥിതി ചെയ്യുന്ന പബ്ലിക് ടോയ്‌ലറ്റ് സമുച്ചയത്തിന്റെ ശോചനീയാവസ്ഥ പോലും പരിഹരിക്കുവാന്‍ ഭരണസമിതിക്ക് കഴിഞ്ഞിട്ടില്ല. ഈ വിഷയത്തില്‍ പ്രതിപക്ഷം ചെയര്മാന് കത്ത് നല്‍കിയിട്ട് മാസങ്ങളായി. എന്നാല്‍ ഇതുവരെ യാതൊരു നടപടിയും സ്വീകരിച്ചിട്ടില്ല.
നഗരസഭാ കാര്യാലയത്തിന്റെ പിന്‍ഭാഗത്ത് സ്റ്റേഡിയത്തില്‍ നിര്‍മ്മിച്ചിരിക്കുന്ന പൊതു ശൗചാലയത്തിന്റെ അവസ്ഥയും വിഭിന്നമല്ല. തെക്കേക്കരയിലെ പൊതു ശൗചാലയങ്ങള്‍ വ്യത്തി ഹീനമാന്നെന്ന പരാതിക്ക് വര്‍ഷങ്ങളുടെ പഴക്കമുണ്ട്. പാലാ വലിയ പാലത്തിന് കീഴിലുള്ള പൊതുശൗചാലയം പൊതുജനത്തിന് ഇതേവരെ തുറന്നുകൊടുത്തിട്ടില്ല.
പാലാ നഗരസഭയുടെ പൊതുശൗചാലയം എന്ന ബോര്‍ഡ് വെച്ചിരിക്കുന്നത് കണ്ട് പ്രാഥമിക ആവശ്യങ്ങള്‍ക്കായി ഓടിയെത്തുന്നവര്‍ താഴിട്ട് പൂട്ടിയ ശൗചാലയങ്ങള്‍ കണ്ട് പകച്ചു നില്‍ക്കുകയാണ്. ഇതാണ് പാലാ നഗരസഭയുടെ സുന്ദര ഭരണം.
പാലാ ഡംബിംഗ് സ്റ്റേഷനായി മാറ്റിയ ഭരണം:
ശുചിമുറി മാലിന്യങ്ങള്‍ ആര്‍ക്കും തള്ളാവുന്ന ഡംബിംഗ് സ്റ്റേഷനായി പാലായെ മാറ്റി എന്നതാണ് നഗരസഭയുടെ ഏക ഭരണ നേട്ടം. ശുചിമുറി മാലിന്യങ്ങള്‍ ശാസ്ത്രീയമായി സംസ്‌കരിക്കുന്നത് സംബന്ധിച്ച പ്രതിപക്ഷത്തിന്റെ പ്രമേയം തികഞ്ഞ ലാഘവത്തോടെയാണ് ഭരണാധികാരികള്‍ കൈകാര്യം ചെയ്തത്.
ഉത്തരവാദിത്വമുള്ള ഒരു നഗര ഭരണം പാലായില്‍ ഉണ്ടെങ്കില്‍ മാലിന്യങ്ങള്‍ പാലായില്‍ തള്ളാന്‍ ഒരുത്തരും ധൈര്യപ്പെടില്ല. കഴിഞ്ഞ കാലങ്ങളില്‍ ഇത്തരം വിഷയം ഉണ്ടായപ്പോള്‍ നഗരസഭ പ്രത്യേക സ്‌ക്വാഡിനെ രംഗത്തിറക്കിയിരുന്നു.
കുത്തഴിഞ്ഞ മാലിന്യ സംസ്കരണം:
തദ്ദേശസ്ഥാപനങ്ങളുടെ പ്രാഥമിക ഉത്തരവാദിത്വങ്ങളില്‍ ഒന്നായ മാലിന്യ സംസ്കരണം പാലാ നഗരസഭയില്‍ കുത്തഴിഞ്ഞു കിടക്കാന്‍ തുടങ്ങിയിട്ട് വര്‍ഷങ്ങളായി. ജൈവ ഖരമാലിന്യ സംസ്‌കരണ പദ്ധതികള്‍ക്ക് വേണ്ടി പണം ചെലവാക്കിയിട്ടും ഭരണസമിതിയുടെ ദീര്‍ഘവീക്ഷണം ഇല്ലായ്മയും, പദ്ധതികള്‍ കൃത്യമായി പ്രവര്‍ത്തിപ്പിക്കുവാനുള്ള ആര്‍ജ്ജവം ഇല്ലായ്മയും മൂലം ജനങ്ങള്‍ കഷ്ടപ്പെടുകയാണ്. കൊട്ടാരമറ്റം ബസ് സ്റ്റാന്‍ഡിനെയും മാര്‍ക്കറ്റ് കോംപ്ലക്‌സിലെയും തുമ്പൂര്‍മുഴി മാലിന്യ സംസ്‌കരണ പ്ലാന്റുകള്‍ ഇന്ന് ഡബ്ബിങ് യാര്‍ഡുകള്‍ പോലെയാണ് പ്രവര്‍ത്തിക്കുന്നത്.
ഇവ സാംക്രമിക രോഗങ്ങളുടെ പ്രവഹ കേന്ദ്രമാണെന്നുള്ളത് പാലായിലെ പൊതുജന ആരോഗ്യത്തിന് വിലകല്‍പ്പിക്കാത്ത നഗരസഭ ഭരണസമിതിയുടെ നിലപാടിന്റെ പ്രതിഫലനമാണ്. അജൈവ മാലിന്യ സംസ്‌കരണത്തിന്റെ ശേഖരണ സംവിധാനമായ എം.സി.എഫ്. സ്ഥാപിക്കാന്‍ കഴിയാതെ പോയി.
നശിക്കുന്ന മുനിസിപ്പല്‍ സ്റ്റേഡിയം:
സിന്തറ്റിക് ട്രാക്ക് ഉള്‍പ്പെടെ നശിച്ചിട്ട് വര്‍ഷങ്ങളായിട്ടും നഗരസഭയ്ക്ക് ഒരു കൂസലും ഇല്ല എന്നതാണ് യാഥാര്‍ത്ഥ്യം. ജനങ്ങളുടെ കണ്ണില്‍ പൊടിയിടാന്‍ പ്രഖ്യാപിച്ച പുനരുദ്ധാരണ പദ്ധതികളൊന്നും ഫലപ്രാപ്തിയില്‍ എത്തിയിട്ടില്ല. ഗ്രീന്‍ഫീല്‍ഡ് സര്‍ക്കാര്‍ ആഘോഷ പരിപാടിക്ക് പന്തലിട്ടു നശിപ്പിച്ചതും നഗരസഭയുടെ അനുവാദത്തോടുകൂടിയാണ്. ഇത്തരത്തില്‍ കെടുകാര്യസ്ഥതയുടെയും അധികാര ദുര്‍വിനിയോഗത്തിന്റെയും പ്രതീകമായി നഗരസഭ സ്റ്റേഡിയം മാറി.
വെള്ളക്കെട്ട് നിര്‍മാര്‍ജനത്തിലെ അനാസ്ഥ:
ശക്തമായ ഒരു മഴ പെയ്താല്‍ തന്നെ പാലാ നഗരത്തില്‍ ഉടനീളം വലിയ വെള്ളക്കെട്ടുകള്‍ രൂപപ്പെടുന്നത് നഗരസഭയുടെ കെടുകാര്യസ്ഥത മൂലം തന്നെയാണ്. അനധികൃതമായ തോട് ഡ്രൈനേജ് കയ്യേറ്റങ്ങള്‍ ഭരണസമിതിയുടെ മൗനാനുവാദത്തോടെയാണ് നടന്നിട്ടുള്ളത്.
മഴക്കാലപൂര്‍വ്വ ഡ്രൈനേജ് ക്ലീനിങ് കാര്യക്ഷമമല്ലാത്തതിനാലാണ് വെള്ളക്കെട്ടുകള്‍ രൂപപ്പെടുന്നത് എന്നത് അറിയാമായിരുന്നിട്ടും ഒരിക്കല്‍പോലും ഇതിനുവേണ്ട മുന്നൊരുക്കങ്ങള്‍ നടത്താന്‍ ഭരണസമിതി കൂട്ടാക്കിയിട്ടില്ല എന്നത് ഖേദകരമാണ്.
ലണ്ടന്‍ ബ്രിഡ്ജും, ഓപ്പണ്‍ ഓഡിറ്റോറിയവും:
ഉദ്ഘാടന മാമാങ്കങ്ങള്‍ക്കപ്പുറം പൊതുജനത്തിന് ഒരു പ്രയോജനവും ഇല്ലാത്ത ഈ പദ്ധതികളുടെ കാര്യത്തില്‍ നഗരസഭയുടെ അനാസ്ഥ കുറ്റകരമാണ് എന്ന് പറയേണ്ടിയിരിക്കുന്നു. സാമൂഹ്യവിരുദ്ധരുടെയും ലഹരി മാഫിയ സംഘങ്ങളുടെയും ഇടത്താവളങ്ങള്‍ ആയി ഈ പൊതു ഇടങ്ങള്‍ മാറിയതിനുള്ള ഉത്തരവാദിത്വം നഗരസഭാ ഭരണസമിതിയുടെത് മാത്രമാണ്.
മീനച്ചിലാറ്റിലേക്ക് മാലിന്യം ഒഴുക്കുന്ന വ്യാപാര സ്ഥാപനങ്ങള്‍ക്ക് നേരെ കണ്ണടയ്ക്കുന്ന നഗരസഭാ ഭരണസമിതി
പാലായുടെ ജലസ്രോതസായ മീനച്ചിലാര്‍ മലിനമാക്കുന്നതിന്റെ ഒന്നാമത്തെ ഉത്തരവാദി നഗരസഭാ ഭരണ സമിതിയാണ്. നിരവധി വ്യാപാര സ്ഥാപനങ്ങളില്‍ നിന്ന് മീനച്ചിലാറ്റിലേക്ക് മാലിന്യം ഒഴുക്കുന്നത് തടയാന്‍ ഭരണസമിതിക്ക് സാധിച്ചിട്ടില്ല. ഭരണസമിതി അംഗങ്ങളുടെയും ഭരണകക്ഷികളുടെയും ഇഷ്ടക്കാരുടെ ഈ നിയമവിരുദ്ധ പ്രവര്‍ത്തനങ്ങള്‍ക്ക് കുടപിടിക്കുന്ന സമീപനമാണ് നഗരസഭാ ഭരണ സമിതി സ്വീകരിക്കുന്നത്.
അനധികൃത നിര്‍മ്മാണങ്ങളും, കൈയേറ്റങ്ങളും:
നഗരസഭ പരിധിക്കുള്ളില്‍ സുഗമമായി നടക്കുന്ന അനധികൃത നിര്‍മ്മാണങ്ങള്‍ക്കും കയ്യേറ്റങ്ങള്‍ക്കും നേരെ കണ്ണടയ്ക്കുന്ന സമീപനമാണ് ഭരണസമിതി കാലങ്ങളായി കൈക്കൊണ്ടുപോരുന്നത്. നിരവധിതവണ ജനകീയ പ്രക്ഷോഭങ്ങള്‍ ഉയര്‍ന്നിട്ടും ഇവയ്‌ക്കെതിരെ ചെറുവിരല്‍ അനക്കുവാന്‍ ഭരണസമിതിക്ക് സാധിച്ചിട്ടില്ല.
അനധികൃത വഴിയോര കച്ചവടങ്ങള്‍:
മുനിസിപ്പല്‍ ലൈസന്‍സ് എടുത്ത്, ഭീമമായ വാടക നല്‍കി, നിയമാനുസൃതം കച്ചവടം നടത്തുന്ന വ്യാപാര സമൂഹത്തിന് ഏറ്റവും വലിയ വെല്ലുവിളി ഇന്ന് പാലാ നഗരത്തില്‍ സജീവമായ അനധികൃത വഴിയോര വാണിഭങ്ങളാണ്.
വ്യാപാര സമൂഹത്തില്‍ നിന്നും നിരവധി വട്ടം വിഷയം ശ്രദ്ധയില്‍ പെടുത്തിയെങ്കിലും കാര്യക്ഷമമായ ഇടപെടലുകള്‍ നടത്താത ഭരണസമിതി ഇത് അഴിമതിക്കുള്ള ഉപാധിയായിട്ടാണ് കാണുന്നത്. ഭരണകക്ഷിയിലെ പ്രമുഖ പാര്‍ട്ടികളില്‍ ഇത്തരം അനധികൃത വഴിയോര വാണിഭ സംഘങ്ങളില്‍ നിന്ന് വലിയ തുക കപ്പം പറ്റുന്നുണ്ട്.
ഉദ്യോഗസ്ഥ തലത്തിലെ അനാസ്ഥകള്‍:
കടുത്ത സാമ്പത്തിക പ്രതിസന്ധിയിലൂടെ കടന്നുപോകുന്ന നഗരസഭയില്‍ ഉദ്യോഗസ്ഥ തലത്തിലും വലിയ അനാസ്ഥയാണ്. കൃത്യമായി നികുതി പിരിച്ചെടുക്കുവാനും, നിയമലംഘനങ്ങള്‍ കണ്ടെത്തി പിഴ ഈടാക്കുവാനും ഉത്തരവാദിത്തപ്പെട്ട ഉദ്യോഗസ്ഥര്‍ തങ്ങളുടെ ചുമതലകള്‍ കൃത്യമായി നിര്‍വഹിക്കാത്തതും ഭരണാധികാരികളുടെ കഴിവുകേടാണ്.
നിരവധി വിജിലന്‍സ് അന്വേഷണങ്ങളുടെ പരിധിയിലാണ് നഗരസഭ എന്നത് തന്നെ അഴിമതിയുടെ പ്രതിഫലനമാണ്. വിജിലന്‍സ് റെയ്ഡുകള്‍ പോലും നഗരസഭയില്‍ ഒരു സാധാരണ സംഭവമായി മാറിയിരിക്കുന്നു.
വര്‍ക്കിംഗ് വിമന്‍സ് ഹോസ്റ്റല്‍ കൈമാറ്റ പ്രഹസനം:
കഴിഞ്ഞ മൂന്നു വര്‍ഷത്തിനിടെ ചെയര്മാന് പദവി അലങ്കരിച്ച മൂന്നു വ്യക്തികളും ഒരേപോലെ ഉദ്ഘാടനം ചെയ്ത പദ്ധതിയാണ് വര്‍ക്കിംഗ് വിമന്‍സ് ഹോസ്റ്റല്‍ കെട്ടിടത്തിന്റെ കൈമാറ്റം.
ബലക്ഷയമുള്ള കെട്ടിടം ഇങ്ങനെ കൈമാറി വാര്‍ത്ത സൃഷ്ടിക്കുന്നതല്ലാതെ ഒരു ഹോസ്റ്റല്‍ അവിടെ സജ്ജമാക്കുവാന്‍ കഴിഞ്ഞ അഞ്ചു വര്‍ഷത്തിനിടയിലും സാധിച്ചിട്ടില്ല എന്നത് ഖേദകരമാണ്. നഗരസഭയില്‍ നടക്കുന്ന ഓരോ ഉദ്ഘാടനകളും പ്രഖ്യാപനങ്ങളും ഇതുപോലുള്ള പ്രഹസനങ്ങള്‍ ആകുന്നത് ജനങ്ങളെ ഭയമില്ലാത്തതുകൊണ്ടും മതിപ്പില്ലാത്തതു കൊണ്ടുമാണ്.
ഡെപ്പോസിറ്റ് തിരികെ കിട്ടാത്ത വാടകക്കാര്‍:
വന്‍ തുക ഡെപ്പോസിറ്റ് നല്‍കി നഗരസഭയുടെ ഉടമസ്ഥതയിലുള്ള വ്യാപാര സമുച്ചയങ്ങളില്‍ മുറികള്‍ വാടകയ്ക്ക് എടുത്തവര്‍ കബളിപ്പിക്കപ്പെട്ടിരിക്കുകയാണ്. പല കെട്ടിടങ്ങളിലെയും അടിസ്ഥാന സൗകര്യങ്ങളുടെ അഭാവം വ്യാപാര പ്രവര്‍ത്തനങ്ങള്‍ അസാധ്യമാക്കുന്നു.
ഇത് തിരിച്ചറിഞ്ഞ് വാടക കരാര്‍ ഉപേക്ഷിച്ച് കെട്ടിടം വിട്ട് നല്‍കിയ പലര്‍ക്കും വര്‍ഷങ്ങളായി ഡെപ്പോസിറ്റ് തുക തിരികെ നല്‍കുക നഗരസഭയ്ക്ക് സാധിച്ചിട്ടില്ല എന്നുള്ളത് വിശ്വാസ വഞ്ചനയുടെ ഉത്തമ ഉദാഹരണമാണ്.
നഗരസഭ പ്രതിപക്ഷ നേതാവ് പ്രൊഫ.സതീശ് ചൊള്ളാനി, ജോസ് എടേട്ട്, പ്രിന്‍സ് വി.സി, ജിമ്മി ജോസഫ്, ലിസിക്കുട്ടി മാത്യു, ആനി ബിജോയി, മായ രാഹുല്‍, സിജി ടോണി, ലിജി ബിജു തുടങ്ങിയവര്‍ പങ്കെടുത്തു.
