പാലാ: രൂപത കോർപ്പറേറ്റ് എജുക്കേഷണൽ ഏജൻസിയും പാലാ സെന്റ് തോമസ് കോളേജും സംയുക്തമായി നടത്തുന്ന സി ഫുട്ബോൾ സൂപ്പർ ലീഗിൽ വെള്ളിയാഴ്ച വൈകുന്നേരം കടനാട് സ്കൂൾ ഗ്രൗണ്ടിൽ നടന്ന ആവേശകരമായ മത്സരത്തിൽ സെന്റ് തോമസ് എച്ച്.എസ്.എസ് പാലായെ ഒന്നിനെതിരെ രണ്ട് ഗോളുകൾക്ക് പരാജയപ്പെടുത്തി ആതിഥേയരായ കടനാട് സെന്റ് സെബാസ്റ്റ്യൻസ് എച്ച്.എസ്.എസ് വിജയം കൊയ്തു.
വൈകുന്നേരം 3 മണിക്ക് ആരംഭിച്ച പോരാട്ടത്തിൽ ഇരു ടീമുകളും ഒപ്പത്തിനൊപ്പം പോരാടിയെങ്കിലും കടനാടിന്റെ പ്രതിരോധ നിരയും ഗോൾകീപ്പറും പാലായുടെ ഗോൾ ശ്രമങ്ങളെ വിഫലമാക്കി. കടനാട് വലയ്ക്ക് മുന്നിൽ വൻമതിലായി നിലകൊണ്ട ഗോൾകീപ്പർ ശബരി ആണ് മത്സരത്തിലെ താരം.
ശനിയാഴ്ച വൈകുന്നേരം 3 മണിക്ക് കാഞ്ഞിരത്താനം സെന്റ് ജോൺസ് എച്ച്.എസ്.എസ് സ്കൂൾ മൈതാനത്ത് നടക്കുന്ന മത്സരത്തിൽ ആതിഥേയർ കടനാട് സെന്റ് സെബാസ്റ്റ്യൻസ് എച്ച്.എസ്.എസ് സ്കൂളിനെയും, അറക്കുളം സെന്റ് മേരിസ് സ്കൂൾ മൈതാനത്ത് നടക്കുന്ന മറ്റൊരു മത്സരത്തിൽ ആതിഥേയർ ഇലഞ്ഞി
സെന്റ് പീറ്റേഴ്സ് എച്ച്.എസ്.എസ് സ്കൂളിനെയും നേരിടും. പോയിന്റ് പട്ടികയിൽ അറക്കുളം സെന്റ് മേരിസ് സ്കൂൾ മുന്നിട്ടുനിൽക്കുന്നു. പാലാ സെന്റ് തോമസ് സ്കൂളാണ് രണ്ടാമത്.
