ഭരണങ്ങാനം: വിശുദ്ധ അൽഫോൻസാമ്മയുടെ തിരുനാളിന് ഭരണങ്ങാനം അൽഫോൻസാ തീർത്ഥാടനകേന്ദ്രത്തിൽ ജൂലൈ 19 ന് കൊടിയേറും. രാവിലെ 11.15 ന് ബിഷപ് മാർ ജോസഫ് കല്ലറങ്ങാട്ട് കൊടിയേറ്റ് നിർവഹിക്കും. പ്രധാന തിരുനാൾ 28 ന്.
തിരുനാൾ ദിവസങ്ങളിൽ ദിവസവും രാവിലെ 5.30, 6.45, 8.30, 10.00, 11.30, വൈകുന്നേരം 2.30, 3.30, 5.00. 7.00 എന്നീ സമയങ്ങളിൽ വിശുദ്ധ കുർബാനയും നൊവേനയും ഉണ്ടായിരിക്കും. ദിവസവും വൈകുന്നേരം 4.30 ന് സായാഹ്ന പ്രാർത്ഥനയും 6.15 ന് ജപമാല മെഴുകുതിരി പ്രദക്ഷിണവുമുണ്ട്.
വിവിധ ബിഷപ്പുമാരും 140 വൈദികരും തിരുനാൾ ദിവസങ്ങളിൽ വിവിധ സമയങ്ങളിലായി വിശുദ്ധ കുർബാനയർപ്പിക്കും. 27 ന് വൈകുന്നേരം 6.30 ന് ഭരണങ്ങാനം ക്ലാരമഠത്തിലേക്ക് ജപമാല-മെഴുകുതിരി പ്രദക്ഷിണം. പ്രധാന തിരുനാൾ ദിനമായ 28 ന് പുലർച്ചെ 4.45 മുതൽ രാത്രി 9.30 വരെ തുടർച്ചയായി കബറിട ദൈവാലയത്തിൽ വിശുദ്ധ കുർബാന.
രാവിലെ ഏഴിന് മാർ ജോസഫ് പള്ളിക്കാപ്പറമ്പിൽ നേർച്ചയപ്പം വെഞ്ചരിക്കും. 10.30 ന് സെന്റ് മേരീസ് ഫൊറോന ദൈവാലയത്തിൽ ബിഷപ് മാർ ജോസഫ് കല്ലറങ്ങാട്ട് വിശുദ്ധ കുർബാനയർപ്പിക്കും. 12.30 ന് പ്രധാന ദൈവാലയത്തിൽനിന്ന് പ്രദക്ഷിണം ആരംഭിച്ച് അൽഫോൻസാ തീർത്ഥാടനകേന്ദ്രത്തിലെത്തി നഗരവീഥിയിലൂടെ ഇടവക ദൈവാലയത്തിൽ സമാപിക്കും.
24 ന് രാവിലെ 11 ന് അൽഫോൻസാ നാമധാരികളുടെ സംഗമം. തിരുനാൾ ദിവസങ്ങളിൽ കബറിട ദൈവാലയം 24 മണിക്കൂറും തുറന്നിടും. ഹിന്ദി, ഇംഗ്ലീഷ്, തമിഴ് ഭാഷകളിൽ വിവിധ ദിവസങ്ങളിൽ വിശുദ്ധ കുർബാനയുണ്ടാകും.
27, 28 തിയതികളിൽ പ്രധാന തിരുനാൾ കുർബാന ഫൊറോനാ ദൈവാലയത്തിൽ നടത്തും. തിരുനാൾ ദിനങ്ങളിലെ ജപമാല പ്രദക്ഷിണവും ഇടവക ദൈവാലയം ചുറ്റിയാണ് തിരിച്ചെത്തുന്നത്. തിരുനാളിന്റെ രണ്ട് പ്രദക്ഷിണങ്ങളും ആരംഭിക്കുന്നതും അവസാനിക്കുന്നതും ഇടവക ദൈവാലയത്തിലാണ്.
വികാരി ഫാ. സക്കറിയാസ് ആട്ടപ്പാട്ട്, തീർത്ഥാടനകേന്ദ്രം റെക്ടർ ഫാ. അഗസ്റ്റിൻ പാലയ്ക്കാപ്പറമ്പിൽ, അഡ്മിനിസ്ട്രേറ്റർ ഫാ. മാത്യു കുറ്റിയാനിക്കൽ, അസിസ്റ്റന്റ് റെക്ടർമാരായ ഫാ. ജോസഫ് അമ്പാട്ട്, ഫാ. ആന്റണി തോണക്കര എന്നിവർ തിരുനാൾ ചടങ്ങുകൾക്ക് നേതൃത്വം നൽകും.
