പ്രവിത്താനം : സെന്റ് മൈക്കിൾസ് ഹയർസെക്കൻഡറി സ്കൂളിലെ ലിറ്റിൽ കൈറ്റ്സ് ക്ലബ്ബിന്റെ ആഭിമുഖ്യത്തിൽ സംഘടിപ്പിക്കുന്ന ഓൾ കേരള ഇന്റർ സ്കൂൾ ഐ.സി.ടി. ക്വിസ് മത്സരത്തിന് വിദ്യാർത്ഥികളിൽ നിന്നും ആവേശ പ്രതികരണം.
2024 നവംബർ 15 വെള്ളിയാഴ്ച നടക്കുന്ന മത്സരത്തിനുള്ള ഓൺലൈൻ രജിസ്ട്രേഷൻ നവംബർ 12ന് അവസാനിക്കും. പൊതുവിദ്യാഭ്യാസ മേഖലയിലെ ഗവൺമെന്റ്, എയ്ഡഡ്, അൺ എയ്ഡഡ് സ്കൂളുകളിലെ ഹൈസ്കൂൾ, യു.പി. വിഭാഗങ്ങൾക്കായി പ്രത്യേകം നടത്തുന്ന മത്സരത്തിൽ ഇതിനോടകം തന്നെ കേരളത്തിന്റെ വിവിധ ഭാഗങ്ങളിൽ നിന്നായി നിരവധി സ്കൂളുകൾ രജിസ്റ്റർ ചെയ്തു കഴിഞ്ഞു.
ഇരു വിഭാഗങ്ങളിലുമായി ആകെ 20,000 രൂപയുടെ ക്യാഷ് പ്രൈസും, സർട്ടിഫിക്കറ്റും സമ്മാനമായി നൽകുന്നു. കൂടാതെ എസ്കോർറ്റിങ്ങ് സ്റ്റാഫ് അംഗങ്ങൾക്കായി പ്രത്യേക മത്സരവും ഒരുക്കിയിട്ടുണ്ട്.
സ്കൂൾ മാനേജർ വെരി. റവ. ഫാ.ജോർജ് വേളൂപറമ്പിലിന്റെ അധ്യക്ഷതയിൽ ചേരുന്ന യോഗത്തിൽ വച്ച് പാലാ രൂപത കോർപ്പറേറ്റ് എജുക്കേഷനൽ ഏജൻസി സെക്രട്ടറി വെരി. റവ. ഫാ. ജോർജ് പുല്ലുകാലായിൽ മത്സരം ഉദ്ഘാടനം ചെയ്യും. സുപ്രസിദ്ധ സിനിമാതാരം മിയ ജോർജ് മുഖ്യാതിഥിയായി പങ്കെടുക്കും.
പൂർവ വിദ്യാർത്ഥിയും കേരള പ്രവാസി കോൺഗ്രസ് സിഡ്നി കോർഡിനേറ്ററുമായ സിബിച്ചൻ ജോസഫ് കൂടമറ്റത്തിൽ, പ്രിൻസിപ്പൽ ജിജി ജേക്കബ്, ഹെഡ്മാസ്റ്റർ അജി വി. ജെ. തുടങ്ങിയവർ സംബന്ധിക്കും. വിശദ വിവരങ്ങൾക്ക് 9744586325, 8129606503 എന്നീ നമ്പറുകളിൽ ബന്ധപ്പെടുക.
