ജില്ലയിലെ വിവിധ സ്ഥലങ്ങളില്‍ അടച്ചിട്ട വീടുകളില്‍ മോഷണം: നിരവധി മോഷണക്കേസുകളില്‍ പ്രതികളായ രണ്ടു പേരെ കാഞ്ഞിരപ്പള്ളി പൊലീസ് പിടികൂടി

കോട്ടയം: ജില്ലയിലെ വിവിധ സ്ഥലങ്ങളില്‍ അടച്ചിട്ട വീടുകളില്‍ മോഷണം നടത്തിയ ശേഷം ഒളിവില്‍ കഴിഞ്ഞിരുന്ന രണ്ടു പ്രതികളെ കാഞ്ഞിരപ്പള്ളി പൊലീസ് പിടികൂടി.

ആലപ്പുഴ കണ്ടല്ലൂര്‍ വടക്കേമുറി പെരുമനപുതുവേല്‍ വീട്ടില്‍ സുധീഷ് (38), തിരുവല്ല തുകലശേരി പൂമംഗലം വീട്ടില്‍ ശരത് ശശി (34) എന്നിവരെയാണ് കാഞ്ഞിരപ്പള്ളി DYSP കെ.എല്‍ സജിമോന്റെ നേതൃത്വത്തിലുള്ള സംഘം അറസ്റ്റ് ചെയ്തത്.

മാസങ്ങളായി ജില്ലയിലെ വിവിധ സ്ഥലങ്ങളില്‍ ആളില്ലാത്ത വീടുകള്‍ കേന്ദ്രീകരിച്ച് വന്‍ മോഷണങ്ങള്‍ നടക്കുന്നുണ്ടായിരുന്നു. ഇതു സംബന്ധിച്ചു പരാതി വ്യാപകമായതോടെ ജില്ലാ പൊലീസ് മേധാവി ഡി.ശില്‍പയുടെ നേതൃത്വത്തില്‍ പ്രത്യേക അന്വേഷണ സംഘം രൂപീകരിക്കുകയായിരുന്നു.

പാലായിലെയും സമീപ പ്രദേശങ്ങളിലെയും വാര്‍ത്തകളും ജോലി സാധ്യതകളും അറിയാന്‍ വാട്‌സാപ് ഗ്രൂപ്പില്‍ ജോയിന്‍ ചെയ്യൂ… GROUP 19

തുടര്‍ന്നു നടത്തിയ അന്വേഷണത്തിലാണ് സ്‌കൂട്ടറില്‍ വരികയായിരുന്ന സുധീഷിനെയും, ശരത്തിനെയും പൊലീസ് സംഘം തടഞ്ഞു നിര്‍ത്തി ചോദ്യം ചെയ്തു. ഇതോടെയാണ് പ്രതികള്‍ മോഷണം ലക്ഷ്യമിട്ട് എത്തിയതാണ് എന്നു വ്യക്തമായത്.

കാഞ്ഞിരപ്പള്ളി സ്റ്റേഷന്‍ ഹൗസ് ഓഫിസര്‍ M.J ഷൈജു, S.I എല്‍ദോപോള്‍, ഗ്രേഡ് എസ്‌ഐമാരായ വി.എസ് ഷിബൂക്കുട്ടന്‍, ജോര്‍ജ്കുട്ടി, സീനിയര്‍ സിവില്‍ പൊലീസ് ഓഫിസര്‍ നവാസ്, ജോബി സിവില്‍ പൊലീസ് ഓഫിസര്‍മാരായ ശ്യാം എസ്. നായര്‍, ശ്രാവണ്‍ എന്നിവരുടെ നേതൃത്വത്തില്‍ പ്രതികളെ കസ്റ്റഡിയില്‍ എടുത്ത് ചോദ്യം ചെയ്തു.

തുടര്‍ന്നു നടത്തിയ അന്വേഷണത്തില്‍ കായംകുളം, കന്നക്കുന്ന്, കുറത്തിക്കാട്, കരീലക്കുളങ്ങര എന്നീ പൊലീസ് സ്റ്റേഷനുകളില്‍ മോഷണക്കേസുകളില്‍ ഇരുവരും പ്രതികളാണ് എന്നു കണ്ടെത്തി.

മോഷണക്കേസില്‍ ജയിലിലായിരുന്ന ഇരുവരും മാസങ്ങള്‍ക്കു മുന്‍പ് മാത്രമാണ് ജാമ്യത്തിലിറങ്ങിയത്. തുടര്‍ന്നു, സ്‌കൂട്ടറില്‍ ജില്ലയില്‍ എത്തി മോഷണം നടത്തുന്നതിനു പദ്ധതി തയ്യാറാക്കുകയായിരുന്നു.

വൈകിട്ട് ആറു മണിയ്ക്കും പത്തിനും ഇടയ്ക്കാണ് പ്രതികള്‍ മോഷണം നടത്തിയിരുന്നത്. ബൈക്കില്‍ ശരത്ത് എത്തിയ ശേഷം, സുധീഷിനെ ഇറക്കി വിടും. തുടര്‍ന്ന് സ്ഥലത്ത് ശരത്ത് ഒളിച്ചിരിക്കും. തുടര്‍ന്നു, മോഷണത്തിന് ശേഷം പ്രതികള്‍ ബൈക്കില്‍ രക്ഷപെടുകയാണ് ചെയ്യുന്നത്.

കോട്ടയം ഈസ്റ്റ് പൊലീസ്, പത്തനംതിട്ട, റാന്നി പൊലീസ് സ്റ്റേഷന്‍ പരിധിയിലും പുതുപ്പള്ളി, ചെങ്ങന്നൂര്‍, റാന്നി, മെഡിക്കല്‍ കോളേജ് എന്നിവിടങ്ങളിലും മോഷണക്കേസുകളില്‍ പ്രതികള്‍ ഉള്‍പ്പെട്ടിട്ടുണ്ട്.