കുറവിലങ്ങാട് മര്‍ത്ത മറിയം പള്ളിയിലെ നോമ്പ് തിരുനാളിനോടനുബന്ധിച്ച് പാലാ രൂപത ബിഷപ്പായ മാര്‍ ജോസഫ് കല്ലറങ്ങാട് നടത്തിയ പ്രസംഗത്തോടനുബന്ധിച്ചുണ്ടായ പ്രതിഷേധങ്ങളുടെ പശ്ചാത്തലത്തില്‍ സമൂഹ മാധ്യമങ്ങളിലൂടെ മതവിദ്വേഷ പരാമര്‍ശങ്ങള്‍ തുടര്‍ച്ചയായി ഷെയര്‍ ചെയ്യുന്നവര്‍ക്കെതിരെ കര്‍ശന നിയമ നടപടി സ്വീകരിക്കുമെന്ന് പാലാ ഡിവൈ. എസ്.പി. ഷാജു ജോസ് അറിയിച്ചു.
ഇത്തരത്തിലുള്ള ചില ഫെയ്‌സ് ബുക്ക് അക്കൗണ്ടുകളും അമ്പതോളം വാട്‌സപ്പ് ഗ്രൂപ്പുകളും സൈബര്‍ പോലീസിന്റെ നിരീക്ഷണത്തിലാണ്. സാമൂദായിക ലഹള സൃഷ്ടിക്കാനുള്ള ശ്രമം ഗൗരവതരമായ കുറ്റകൃത്യമാണ്. ഇക്കാര്യത്തില്‍ കര്‍ശന നടപടി തന്നെ സ്വീകരിക്കാനും പോലീസ് തീരുമാനിച്ചിട്ടുണ്ട്.
പാലായിലും ഈരാറ്റുപേട്ടയിലുമുള്ള വിവിധ സമുദായിക നേതാക്കളുടെ യോഗം ഡിവൈഎസ്പി ഷാജു ജോസിന്റെ നേതൃത്വത്തില്‍ വിളിച്ചു ചേര്‍ത്തിരുന്നു.
യോഗത്തില്‍ ഈരാറ്റുപേട്ട ഇമാം ഏകോപന സമിതി ചെയര്‍മാനായ മുഹമ്മദ് നജീര്‍ നാലവി, കത്തോലിക്ക കോണ്‍ഗ്രസ് ഡയറക്ടറായ ഫാ. ജോര്‍ജ്ജ് വര്‍ഗ്ഗീസ് ഞാറക്കുന്നേല്‍, ഈരാറ്റുപേട്ട നൈനാര്‍ പള്ളി പ്രസിഡന്റും കേരള മുസ്ലീം ജമാ-അത് ഫെഡറേഷന്‍ സംസ്ഥാന പ്രസിഡന്റുമായ മുഹമ്മദ് സക്കീര്‍, കത്തോലിക്ക കോണ്‍ഗ്രസ് നേതാവായ രാജീവ് ജോസഫ് കൊച്ചുപറമ്പില്‍, എന്‍.എസ്.എസ്. ഡയറക്ടര്‍ ബോര്‍ഡ് മെമ്പറും, മീനച്ചില്‍ താലൂക്ക് യൂണിയന്‍ പ്രസിഡന്റുമായ സി.പി ചന്ദ്രന്‍ നായര്‍ ചൊള്ളാനിക്കല്‍, പാസ്റ്ററല്‍ കൗണ്‍സില്‍ സെക്രട്ടറിയായ സി. സെബാസ്റ്റ്യന്‍ കമനാല്‍, ഈരാറ്റുപേട്ട മുഹിയുദ്ദീന്‍ ജുമാ മസ്ജിത് പ്രസിഡന്റായ പി.ടി അറുദ്ദീന്‍ പുള്ളാലില്‍, എസ്.എന്‍.ഡി.പി യോഗം മീനച്ചില്‍ യൂണിയന്‍ അഡ്മിനിസ്‌ട്രേറ്റീവ് അംഗമായ സി.ടി രാജന്‍ അക്ഷര, ഈരാറ്റുപേട്ട പുതുപ്പള്ളി ജുമാ മസ്ജിത് പ്രസിഡന്റായ കെ.ഇ പരീത് കൊല്ലംപറമ്പില്‍ എന്നിവര്‍ പങ്കെടുത്തു.
പാലായില്‍ നടന്ന പ്രതിഷേധ പരിപാടികളില്‍ സാമുദായിക സംഘടനകള്‍ക്ക് യാതൊരുവിധ പങ്കുമില്ലെന്ന് പങ്കെടുത്തവര്‍ അറിയിച്ചതായി ഡിവൈ. എസ്.പി. പറഞ്ഞു.
സോഷ്യല്‍ മീഡിയായിലൂടെ മത-സാമുദായിക സമാധാന അന്തരീക്ഷം തകര്‍ക്കുന്ന രീതിയിലുള്ള പ്രചരണങ്ങള്‍ക്കെതിരെ യോഗം ശക്തമായി അപലപിക്കുകയും ചെയ്തു.
ഈരാറ്റുപേട്ടയിലുള്ള ഫുഡ് പ്രോസസിംഗ് യൂണിറ്റിനെതിരെ ഇത്തരത്തില്‍ സോഷ്യല്‍ മീഡിയായില്‍ വ്യാജപ്രചരണം നടത്തുന്നത് യോഗത്തില്‍ ഉന്നയിക്കുകയും, ഇക്കാര്യത്തില്‍ സൈബര്‍സെല്‍ മുഖാന്തിരം അന്വേഷണം നടത്തി കൃത്യമായി നടപടി സ്വീകരിക്കുന്നതാണെന്നും, മറ്റ് വര്‍ഗ്ഗീയ പരാമര്‍ശവും, കമന്റുകളും നടത്തുന്ന ഫേസ്ബുക്ക്, വാട്‌സാപ്പ് ഗ്രൂപ്പുകള്‍ അന്വേഷണ പരിധിയില്‍ കൊണ്ടുവരുമെന്നും, കുറ്റക്കാര്‍ക്കെതിരെ കര്‍ശന നിയമ നടപടികള്‍ സ്വീകരിക്കുമെന്നും ഡിവൈഎസ്പി ഷാജു ജോസ് യോഗത്തില്‍ വ്യക്തമാക്കി.
പാലായിലെയും സമീപ പ്രദേശങ്ങളിലെയും വാര്‍ത്തകളും ജോലി സാധ്യതകളും അറിയാന്‍ വാട്‌സാപ് ഗ്രൂപ്പില്‍ ജോയിന്‍ ചെയ്യൂ… GROUP 19
