കഴിഞ്ഞ കുറേ വര്‍ഷങ്ങളായി വന്യമൃഗശല്യം തടയുന്നതിനുവേണ്ടി കേന്ദ്ര സര്‍ക്കാര്‍ കേരളത്തിനായി അനുവദിച്ച തുക ചെലവഴിക്കാത്ത കേരള സര്‍ക്കാര്‍, ജനങ്ങളോട് ഉത്തരം പറയാന്‍ തയാറാകണമെന്നും, ഈ കൃത്യവിലോപം പൊറുക്കാനാവുന്നതല്ല എന്നും, കേരള കോണ്‍ഗ്രസ് വര്‍ക്കിംഗ് ചെയര്‍മാനും മുന്‍ കേന്ദ്ര മന്ത്രിയുമായ പി.സി. തോമസ്.
കേരള സര്‍ക്കാരിന്റെ കൃത്യവിലോപം മൂലം എത്രയോ ആളുകളാണ് മരിച്ചുപോകുന്നത് എന്ന് മുഖ്യമന്ത്രിയോ, ഇടതുപക്ഷമുന്നണിയോ ഒന്നും അറിയുന്നില്ലേ, എന്നു തോമസ് ചോദിച്ചു. കണ്ണൂര്‍ ജില്ലയിലെ ഇരിട്ടിക്കു സമീപം 38 വയസ്സ് മാത്രം പ്രായമുള്ള ജസ്റ്റിന്‍ എന്ന യുവാവ് കാട്ടാന കടന്നാക്രമിച്ച് ഇന്നലെ മരണമടയുകയുണ്ടായി.
അദ്ദേഹത്തിന്റെ ഭാര്യ പരിക്കേറ്റ് ഇപ്പോഴും ചികിത്സയിലാണ്. സൗരോര്‍ജ്ജ വേലിയുടെ പണി കുറച്ച് ഭാഗത്തു നടന്നുവെങ്കിലും, ബാക്കി ഭാഗത്ത് നടക്കാനിരിക്കുന്നത് പൂര്‍ത്തിയാകാത്തതു കൊണ്ട്, കാട്ടാനകള്‍ ഉള്‍പ്പെടെ വന്യമൃഗങ്ങള്‍ ഈ മേഖലയില്‍ നിരന്തരം വന്നു കൊണ്ടിരിക്കുകയാണ്.
ഇതുപോലെ കേന്ദ്രം നല്‍കുന്ന പണം ഉപയോഗിച്ചു പോലും, ചെയ്യാന്‍ ഉദ്ദേശിക്കുന്ന ജോലി പൂര്‍ത്തിയാക്കാതെ എത്രയോ സ്ഥലങ്ങളില്‍ ബാക്കി കിടക്കുന്നുണ്ട് എന്ന് അടിയന്തരമായി അവലോകനം ചെയ്തു റിപ്പോര്‍ട്ട് ജനങ്ങളുടെ മുന്‍പില്‍ കേരളസര്‍ക്കാര്‍ വയ്ക്കണമെന്ന് തോമസ് ആവശ്യപ്പെട്ടു.
2014 മുതല്‍ 2021 വരെയുള്ള കാലയളവില്‍, കേന്ദ്രം ഈ ആവശ്യവുമായി ബന്ധപ്പെട്ട് കേരളത്തിന് അനുവദിച്ചത് 74.84 കോടി രൂപയാണ്. എന്നാല്‍ കേരളം ചെലവഴിച്ചത് 40.05 കോടി രൂപാ മാത്രം. ഈ വര്‍ഷങ്ങളില്‍ കേന്ദ്ര സര്‍ക്കാര്‍ നല്‍കിയ തുക എന്തുകൊണ്ടാണ് പൂര്‍ണമായും ഉപയോഗിക്കാത്തത് എന്ന് കേരള സര്‍ക്കാര്‍ വ്യക്തമാക്കണം.
ജനങ്ങള്‍ക്കും അവരുടെ കൃഷിക്കും വന്യമൃഗ ആക്രമണങ്ങളില്‍ നിന്ന് സംരക്ഷണം കൊടുക്കുവാന്‍ അനുവദിക്കുന്ന തുക ചെലവഴിച്ച് തക്കതായ പണികള്‍ സമയത്ത് ചെയ്യാത്തത് എന്താണ് എന്ന് കേരള സര്‍ക്കാര്‍ വ്യക്തമായി ജനങ്ങളെ അറിയിക്കണം. ഇക്കാര്യത്തില്‍ കാര്യക്ഷമത ഉണ്ടാക്കിയേ പറ്റൂ. തോമസ് ആവശ്യപ്പെട്ടു.
പാലായിലെയും സമീപ പ്രദേശങ്ങളിലെയും വാര്‍ത്തകളും ജോലി സാധ്യതകളും അറിയാന്‍ വാട്‌സാപ് ഗ്രൂപ്പില്‍ ജോയിന്‍ ചെയ്യൂ… GROUP 19