കോട്ടയം: പൊലീസ് ഉദ്യോഗസ്ഥരുടെ പേരില്‍ വ്യാജ അക്കൗണ്ട് നിര്‍മ്മിച്ച ശേഷം പണം തട്ടുന്ന സംഘം വ്യാപകമായ സാഹചര്യത്തില്‍ പുതിയ തട്ടിപ്പുമായി ഇറങ്ങിയ പത്തൊന്‍പതുകാരന്‍ പിടിയില്‍.
നഷ്ടപ്പെട്ട പ്രണയം തിരികെ പിടിക്കുന്നതിനായി, ക്രൈം ബ്രാഞ്ച് ഇന്‍സ്പെക്ടറുടെ പേരില്‍ വ്യാജ അക്കൗണ്ട് ഉണ്ടാക്കിയ യുവാവിനെയാണ് സൈബര്‍ പൊലീസ് സംഘം പിടികൂടിയത്.
സംഭവവുമായി ബന്ധപ്പെട്ട് പുനലൂര്‍ സ്വദേശിയായ റെനില്‍ വര്‍ഗീസിനെ (19) സൈബര്‍ സ്റ്റേഷന്‍ ഹൗസ് ഓഫിസര്‍ ഇന്‍സ്പെക്ടര്‍ എം.ജെ അരുണ്‍ അറസ്റ്റ് ചെയ്തു. വ്യാജ ഫെയ്സ്ബുക്ക്് അക്കൗണ്ട് ഉണ്ടാക്കിയ ശേഷം സ്ത്രീകളുമായി ചാറ്റ് ചെയ്യുകയായിരുന്നു പ്രതിയുടെ ലക്ഷ്യമെന്നു പൊലീസ് പറഞ്ഞു.
സാധാരണ തട്ടിപ്പ് സംഘങ്ങളെ പോലെ ഇയാള്‍ ഒരാളോടും പണം ആവശ്യപ്പെടുകയോ തട്ടിപ്പ് നടത്തുകയോ ചെയ്തിട്ടില്ലെന്നും സൈബര്‍ പൊലീസ് സംഘം വ്യക്തമാക്കി. ഒരു മാസം മുന്‍പായിരുന്നു കേസിനാസ്പദമായ സംഭവം.
സംസ്ഥാനത്ത് വ്യാപകമായി പൊലീസ് ഉദ്യോഗസ്ഥരുടെ വ്യാജ ഐഡി ഉണ്ടാക്കിയ ശേഷം തട്ടിപ്പ് നടത്തിയിരുന്നു. ഇതിനു പിന്നാലെയാണ് ക്രൈം ബ്രാഞ്ച് ഇന്‍സ്പെക്ടര്‍ അനൂപ് ജോസിന്റെ പേരിലും വ്യാജ ഐഡി രൂപീകരിച്ചത്.
അനൂപ് ജോസിന്റെ പല സുഹൃത്തുക്കള്‍ക്കും ഫ്രണ്ട്സ് റിക്വസ്റ്റ് ലഭിച്ചതോടെയാണ് പൊലീസ് അന്വേഷണം ആരംഭിച്ചത്. തുടര്‍ന്നു നടത്തിയ അന്വേഷണത്തില്‍ പുനലൂരില്‍ നിന്നാണ് വ്യാജ ഐഡി നിര്‍മ്മിച്ചത് എന്നു കണ്ടെത്തി.
തുടര്‍ന്നു പൊലീസ് സംഘം ഈ അക്കൗണ്ട് നിര്‍മ്മിച്ച് ഫോണ്‍ നമ്പര്‍ കണ്ടെത്തി. കഴിഞ്ഞ ദിവസം പുനലൂരില്‍ എത്തിയ പൊലീസ് പ്രതിയെ പിടികൂടി.തുടര്‍ന്നു, ചോദ്യം ചെയ്തതോടെയാണ് ഇയാള്‍ സംഭവം വെളിപ്പെടുത്തിയത്.
തിരുവനന്തപുരം സ്വദേശിയായ പെണ്‍കുട്ടിയുമായി റെനില്‍ അടുപ്പത്തിലായിരുന്നു. കഴിഞ്ഞ മാസം പെണ്‍കുട്ടിയുടെ വീട്ടുകാര്‍ ബന്ധം അറിയുകയും, റെനിലിനെ വിലക്കുകയും, പെണ്‍കുട്ടിയുടെ അക്കൗണ്ടില്‍ നിന്നും റെനിലിനെ ബ്ലോക്ക് ചെയ്യുകയും ചെയ്തു.
ഇതേ തുടര്‍ന്നു ഇയാള്‍ നടത്തിയ പരിശോധനയില്‍ പെണ്‍കുട്ടിയുടെ കുടുംബാംഗങ്ങളില്‍ ചിലരുടെ ഫെയ്സ്ബുക്ക് സുഹൃത്താണ് ഇന്‍സ്പെക്ടര്‍ അനൂപ് ജോസ് എന്നു കണ്ടെത്തി.
തുടര്‍ന്നു ഇദ്ദേഹത്തിന്റെ ഫെയ്സ്ബുക്കില്‍ നിന്നും എടുത്ത ചിത്രങ്ങള്‍ ഉപയോഗിച്ച് വ്യാജ അക്കൗണ്ട് ആരംഭിക്കുകയായിരുന്നു.
ഇതിനു ശേഷം പ്രതി പല പെണ്‍കുട്ടികളുമായും സ്ത്രീകളുമായും അനൂപ് ജോസെന്ന വ്യാജേനെ ചാറ്റ് ചെയ്യുകയും ചെയ്തു. ഇതോടെയാണ് സംഭവം പരാതിയായതും കേസായതും.
പാലായിലെയും സമീപ പ്രദേശങ്ങളിലെയും വാര്‍ത്തകളും ജോലി സാധ്യതകളും അറിയാന്‍ വാട്‌സാപ് ഗ്രൂപ്പില്‍ ജോയിന്‍ ചെയ്യൂ… GROUP 19